'Beɔ 'ɔ wlu ɔ cɛan ‑tie" 'de Kea 'a wlu wɔn 'je ‑tɩ 'ʋn ɛ
101
Dafi 'a 'dʋ.
'Ma muɛ 'diwɔnmɔa' ke, "isrɛa' 'dʋ 'ʋn blea';
ɛmɛ Tʋ "bo, 'ma blewlu 'a 'da.
2 'Ma muɛ "isrɛnyʋ 'a ‑jeblʋ kpaa',
'wɩ ‑jɛɛ 'di ɛ 'je 'ʋn ‑pee ji ɛ?
'Ma nabʋ a muɛ "isrɛa' 'de pɛe 'dɔe 'ʋn,
'de ɛ o ‑gbu" ‑sɔn.
3 'Ɩn se dɛ ‑nynia "jrii "jri "kpei po i.
'Ɩn 'nyɛ dɛsaʋn nʋ 'ʋn 'a kplɩn 'ʋn ɛ.
Ɛ se 'ʋn ‑pʋn" 'nɛ i.
4 Tɔ' saʋn a muɛ 'ʋn o tɛɛn 'a,
'ɩn seɛ "i nɩ 'ɩn ke 'diwɔnyniʋn 'je 'wlʋʋa‑ po.
5 Nyɔ ‑ɔɔ cɛan ɔ ‑ponyiɔ,
'ma muɛ ɔɔ' wɔn "mua'. Nyɔ ‑ɔɔ pɛe 'bɛai" ke,
nyɔ ‑ɔɔ duua nyʋ "jri "kpei ke,
ʋʋ ke 'ʋn se na‑.
6 'Ma muɛ nyʋ ‑ʋʋa' pooa wlu fai",
'de 'blʋa 'di "jriɛ o sia',
ʋʋa muɛ i ‑tea' 'de 'ʋn ‑pʋn",
‑wɛenyʋ ‑srɛai" ke 'ɩn 'je dbo nʋ.
7 Nyɔ 'srɛ i poo i se 'de 'ma ‑gbu" ‑sɔn "ti i,
'de sɩ 'tmʋ i se 'ʋn "juɛi nyna' i.
8 ‑Klae'' pɛɛn "o ‑klae'' pɛɛn,
'ma muɛ 'diwɔnyniʋn ‑nɩa 'de 'blʋa 'di "wɛin kpʋn 'a,
‑bo ɛ 'nɩ kan', ‑wɛe nyʋ "klein ‑ʋʋa nʋa dɩsaɩn ɛ,
ʋʋ 'je i sɔn‑ 'de Tʋ "bo o ‑kwlɔ.